د کابل ښار یوشمېر اوسیدوونکي وايي، چې د ټاکنو خپلواک کمېسیون له لوري په ښوونځیو کې د نوملیکنې پروسې پیل زده کوونکي د امنیتي پېښو له خطر سره مخ کړي او یاده پروسه باید له تعلیمي مراکزو و اېستل شي. په ورته مهال د ملي شورا غړي په ښوونځیو کې د نوم لیکنې مرکزونو جوړېدو سره مخالفت ښيي او وایي، چې دا چاره د پوهنې نظام ټکني کولو سربېره امنیتي ننګونې زیاتوي. دوی په بدیلو ځایونو کې د نوملیکنې د مراکزو جوړولو وړاندیز کوي. خو ټاکنو خپلواک کمېسیون وايي، چې په ښوونځیو کې یې یاده پروسه له پوهنې وزارت سره په همغږۍ پیل کړې او امنیتي ادارو ډاډ ورکړی چې د یادې پروسې امنیت به په بشپړ ډول ساتي. له دې وړاندې هم له ګڼو نیوکو سره سره ټاکنیزو کمېسیونونو د ولسي جرګې نوملیکنې پروسه په ښونځیو کې ترسره کړه، چې په ګڼو دغو ښوونځیو بریدونه وشول او یوشمېر کسانو ته یې مرګ ژوبله هم واړوله.
