خلیلزاد: افغان مشران دې د سولې او ټاکنو په اړه له منفي اړیکو ډډه وکړي

د افغان سولې لپاره د امریکا خاص استازي له یوه خصوصي ټلویزیون سره په مرکه کې ویلي، افغان مشران دې د سولې او ټاکنو په اړه له منفي چارو او اړیکو ډډه وکړي. خلیلزاد د سولې او ټاکنو په اړه د اړیکو څرنګوالی نه دی په ډاګه کړی چې څوک څه ډول منفي چارې او د سیمې له کومو هېوادونو سره اړیکې لري خو نوموړي خبرداری ورکړی چې که دوی دغو منفي کارونو ته دوام ورکړي نومونه به یې ډاګیز شي. د چارو یو شمېر کتوونکي بیا وايي، په دغه ډول یوه حساس پړاو کې ګونګې څرګندونې د سولې بهیر ته سخت زیان اړوي. سیاسي شنوونکی شیرین خان حبیب وايي اړینه وه چې خلیلزاد افغانانو ته خپل دغسې مشران چې سولې او ټاکنو ته خنډونه جوړوي نومونه په ډاګه کړي وی.