عطاء الرحمن سلیم: د ملا برادر راتګ د سولې بهیر له چټکتیا سره مرسته نه ده کړې

د افغانستان د سولې عالي شورا وايي، د ملا عبدالغني برادر راتګ د سولې خبرو کې د طالبانو له خپلواکۍ او صلاحیت سره هېڅ مرسته نه ده کړې. ددې شورا مرستیال مولوي عطاءالرحمن سیلم وايي، د سولې خبرو کې د طالبانو بې صلاحیتي د تېر په شان د یوې ستونزې په توګه پر خپل ځای پاتې ده، چې له امله یې د سولې خبرو کې پرمختګ نه دی راغلی. نوموړي نن په سوله کې د ځوانانو رول تر نامه لاندې غونډه ته د وینا پر مهال وویل، هر کله چې له طالب استازو سره مخ شوی هغوی د سولې خبرو کې د بې صلاحیتۍ احساس کړی دی. د سولې عالي شورا د سولې په خبرو کې د طالبانو پر بې صلاحیتۍ داسې مهال اندېښنه ښيي، چې پاکستان تېر کال د سولې له بهیر سره د مرستې په هدف ملا عبدالغني برادر د امریکا په غوښتنه له بند څخه ازاد کړ.