په داسې حال کې چې په دې وروستیو کې د امریکا او طالب استازو تر منځ د افغان سولې مذاکرات له ځینو ستونزو سره مخ دي، د سولې عالي شورا ویلي چې طالبان له افغان حکومت سره د سولې خبرو اراده نه لري.
د سولې عالي شورا مرستیال چې د سولې او مصالحې په نامه یوې ناستې ته خبرې کولې، ویلي چې افغان حکومت د سولې په برخه کې هر اړخیزې هلې ځلې کوي او په وار وار یې طالبانو ته د خبرو فرصتونه برابر کړي، خو طالبان له حکومت سره د سولې مذاکراتو هېڅ اراده نه لري او د بهرنیو ځواکونو وتل یوه بهانه یادوي.
د دې شورا چارواکي وایي، طالبانو جګړو ته شدت ورکړی او همدا څرګندوي، چې دغه ډله سوله نه غواړي.
د سولې عالي شورا مرستیال عطا الرحمان سلیم ویلي: «طالبان د سولې خبرو ته تیار نه دي او اصلاً موږ د سولې لپاره هېڅ کار نه دی کړی او نه هم باید چې په دې ډول خپل وخت ضایع کړو، موږ یوازې د سولې فرهنګ د ترویج په اړه کار کړی، چې له نېکه مرغه اوس ډېری افغانان په یوه غږ وایي چې سوله غواړو».
د سولې او مصالحې دغه ناسته چې د روشنا ټولنې له خوا رابلل شوې وه، حکومتي چارواکو هم پکې ګډون کړی و.
د ولسمشرغني مېرمنې رولا غني هم دې ناستې ته ویلي، سوله د افغانانو جدي اړتیا ده، خو په هر قیمت سوله نه غواړي او داسې سوله هم نه غواړي چې تېرې لاسته راوړنې یې ضایع شي.
هغې ويلي: «موږ په دې ټینګار کوو چې په هر قیمت سره سوله نه غواړو، داسې سوله چې یوازې د یو څو ورځو لپاره وي او له هغې وروسته بیا جګړې پیل شي، موږ یوازې تلپاتې او پیاوړې سوله غواړو».
دغه راز یادې غونډه ته د بشري حقونو خپلواک کمېسیون مرستیال جنرال ایوب اصیل ويلي، په افغانستان کې هغه وخت سوله راتلای شي، چې بشري حقونو ته درناوی وشي، خو د هغه په خبره، چې په تېرو لسو کلونو کې شاوخوا ۷۵ زره ملکیان وژل شوي او دا یو ټکان ورکوونکی رقم دی.
د سولې عالي شورا داسې مهال وسله وال طالبان تورنوي چې د سولې خبرو ته اراده نه لري. طالبانو ته نږدې کسان وایي چې طالبان له امریکا سره د سولې مذاکراتو په برخه کې مشکوک دي او له همدې امله یې د چین او ایران په ګډون، د امریکا مخالفو هېوادونو ته سفرونه پیل کړي دي.
