د ولسي جرګې غړي حضرت علي ویلي، په ننګرهار ولایت کې داعش ډلې ته په منظم ډول اکمالات کېږي.
نوموړي چې د ننګرهار په دره نور ولسوالۍ کې یوې غونډې ته وینا کوله، ویلي چې داعش پلان لري چې د ننګرهار ولایت په شېرزادو ولسوالۍ کې تر فعالیت وروسته، د دغه ولایت حصارک او د لوګر ولایت ازرې ولسوالۍ له لارې کابل ته ځان ورسوي.
حضرت علي ویلي، داعش د کونړ ولایت ډېری او غرنۍ سیمې نیولې او اوس يې دره نور ولسوالۍ ته لار پیدا کړې ده، چې حکومت یې باید له وړاندې د فعالیتونو مخه ونیسي.
دغه راز د ننګرهار د دره نور ولسوالۍ اوسېدونکو هم د داعش جنګیالیو د حضور او د هغوی د فعالیتونو پر زیاتوالي اندېښنه ښودلې ده.
په ولسي جرګه کې د ننګرهار د خلکو استازي حضرت علي زیاته کړې: «د داعش برنامه دا ده چې د حصارک ولسوالۍ ونیسي، د لوګر ازره ونیسي، سروبي ته ورسېږي او د لغمان سره دغه خط وصل کړي».
په ورته مهال، د ننګرهار د دره نور ولسوالۍ اوسېدونکي هم په دې ولسوالۍ کې د داعش فعالیتونو اندېښمن کړي او له حکومت څخه د دې ولسوالۍ لپاره د جدي پاملرنې غوښتنه کوي.
بلخوا د ننګرهار د ولایتي شورا غړي سهراب قادري هم ويلي چې په دغه ولایت کې د داعش ګواښ جدي دی او حکومت باید له وړاندې د دوی د فعالیتونو د زیاتوالي د مخنیوي لپاره تدابیر ونیسي.
نوموړي زیاته کړې: «که چېرې دلته دښمن ځای پر ځای شو، نو پولیس بیا د دې توانمندي نه لري چې دوی له دې سیمې نه وباسي، نو له همدې کبله حکومت باید له وړاندې خپل تدابیر ونیسي».
په ورته وخت کې د ولسي جرګي غړي حضرت علي ويلي، ځینې مشخصې کړۍ داعش او طالبانو ته اکمالات کوي او حکومت يي باید مخه ونیسي.
نوموړي ويلي، داعش هڅه کوي چې دره نور ولسوالۍ ناامنه کړي او له دې لارې ځان ښېوې ولسوالۍ ته ورسوي.
بلخوا په ننګرهار کې د ملي اردو چارواکو ويلي، هېچاته اجازه نه ورکوي چې ولس ته ستونزې جوړې کړي.
په ننګرهار کې د ملي اردو د څلورمې لېوا درستیزوال ډګروال قنداغا ساپي ويلي: «موږ په ولس باندې د هېچا له لوري ظلم نه منو، که هغه د داعش له لوري وي یا د طالب او یا هم د دولت له لوري».
په دره نور ولسوالۍ کې د داعش د فعالیتونو په تړاو اندېښنې داسې مهال دي، چې تردې مخکې دې ډلې په شینوارو او خوګياڼو ولسوالیو کې خلکو ته درانه مالي او ځاني زیانونه اړولي وو.
د یادونې ده چې داعش ډلې په کونړ ولایت کې هم خپلو فعالیتونو ته زور ورکړی او څه موده وړاندې د دغه ولایت اوسېدونکو ویلي وو، چې یاده ډله په کونړ کې د ځوانانو پر جلب او جذب بوخته ده او پر امنیتي پوستو د بریدونو لپاره تیاری نیسي.
