ملګري ملتونه: افغانستان کې په ځانمرګو بریدونو کې ۷۰ سلنه کموالی راغلی

ملګري ملتونه وایي د تېر کال په پرتله په افغانستان کې په نښتو او ځانمرګو بریدونو کې کموالی راغلی دی. ملګرو ملتونو په یوه تازه راپور کې چې نن به ددغه سازمان امنیت شورا ته وړاندې شي، ویلي په افغانستان کې په امنیتي پېښو او ځانمرګو بریدونو کې کموالی راغلی دی. ددغه سازمان مشر انتونیو ګوتریش وايي د روان کال د فبرورۍ میاشتې له اتمې بیا د مې تر نهمې په افغانستان کې ۵۲۴۹ امنیتي پېښې ثبت شوې، چې د تېر کال د همدې مودې په پرتله په سلو کې اووه کموالی ښيي. همدا راز په راپور کې ویل شوي چې د وړم کال د همدې مودې په پرتله په ځانمرګو بریدونو کې ۷۰ سلنه کموالی راغلی دی. تر ډېره نښتې او نا امنۍ د هېواد په جنوبي، ختیځو او جنوب ختیځو سیمو کې شوې دي. د ملګرو ملتونو امنیت شورا به نن ناوخته دغه راپور تر لاسه کړي او د یادې شورا په غونډه کې به په افغانستان کې پر روانو جګړو، نا امنیو، بشري حقونو، بې ځایه شوو، سولې او نورو مواردو خبرې وکړي.