خلیلزاد له طالب استازو سره د لېدنې لپاره قطر ته رسېدلی

د افغان سولې لپاره د امریکا خاص استازی زلمی خلیلزاد له طالب استازو سره دلیدنې لپاره قطر ته رسېدلی دی. ویل کېږي چې خلیلزاد د دې سفر په ترڅ کې له طالب استازو سره یوه غیر رسمي ناسته هم کړې ده. دوه ورځې وړاندې د طالبانو د قطر دفتر ویاند سهیل شاهین په یوه ټويټ کې له امریکا سره په خبرو کې د پرمختګ په اړه ویلي و، چې امریکا د خبرو په لړ کې منلې چې خپل ټول ځواکونه به له افغانستان څخه وباسي او بیا ځلې به د افغانستان په کورنیو چارو کې لاسوهنه نه کوي. خو د شاهین له ټویټ څخه وروسته زلمي خلیلزاد بیا وویل، چې، امریکا له افغانستان څخه د عسکرو د ایستلو تړون نه؛ بلکې د سولې د یوې هر اړخېزې تګلارې په لټه کې دی چې، د افغانستان له خاورې نړۍ ته د نه تهدید تضمین، د بهرنیو ځواکنو وتل، اوربند او بین الافغاني خبرې له ځانه سره ولري.