څه باندې یوه نیمه میاشت کېږي چې نوې ولسي جرګه د ولسمشر له لوري پرانیستل شوې ده، خو دغه جرګه لا هم پر دې نه ده بریالۍ شوې چې د رییس پر سر رامنځ ته شوی کړکېچ ختم کړي. تر اوسه اداري پلاوی نه دی ګومارل شوی او د ریاست پر سر ناندرۍ پر خپل ځای پاتې دي.
بل پلو د ولسي جرګې د تېرو ټاکنو معترض نوماندان وايي، که ولسي جرګه له موجود وضعیت څخه ونه وځي، دوی به موازي پارلمان اعلان کړي. د ولسي جرګې د نوماندانو سیاسي حرکت وایي چې تېرې ټاکنې له درغلیو ډکې وې، په ټاکنیزو کمېسیونونو کې فساد روان و او حکومت هم په انتخاباتي کمېسیونونو کې مداخلې وکړې، چې په پایله کې یې د خلکو رښتینو استازو پارلمان ته لاره پیدا نه کړه.
د ولسي جرګې د تېرو ټاکنو سیاسي حرکت وایي، چې ولسي جرګه باید له اوسني وضعیت څخه و اېستل شي او که ستونزه حل نه شي، دوی به یې په مقابل کې موازي پارلمان اعلان کړي او له دولت څخه به حساب او کتاب وغواړي.
دوی وایي چې حکومت له ابتدا مشروعیت نه درلود، خو د ملي شورا د اوسني وضعیت دوام به د دولت دوه قوې د عدم مشروعیت له بحران سره مخ کړي. د نوماندانو په خبره: ((د ملي یووالي حکومت د قانون خلاف رامنځ ته شوی، مشروعیت نه لري، خو د ملي شورا اوسنی وضعیت یې نور هم مشروعیت تر پوښتنې لاندې راولي)).
دغه معترض نوماندان وایي، چې د ولسي جرګې تېر انتخابات، له درغلیو، تخطیو او فساد څخه ډک وو او حکومت د انتخاباتي کمېسیونونو په چارو کې مداخله کوله. دوی زیاته کړې: ((د ټاکنیزو کمېسیونونو غړي په فساد کې ښکېل وو، دوی له دندو ګوښه کړل شول، تر څارنې لاندې دي، نو له همدې امله تېرې ټاکنې د منلو وړ نه دي او دولت باید دوی ته حساب ورکړي)).
دوی له دولت او نړیوالو ادارو غواړي، څو په تېرو انتخاباتو کې د شویو درغلیو د څېړنې لپاره یوه ځانګړې محکمه جوړه کړي. دوی وايي، نړیوالې ادارې او دولت دې داسې یوه محکمه جوړه کړي چې په تېرو ټاکنو کې شوې درغلۍ وڅېړي او د خلکو رښتیني استازي ولسي جرګې ته بریالي کړي.
د ولسي جرګې د تېرو انتخاباتو د معترضو نوماندانو ولسي حرکت داسې مهال د موازي پارلمان د جوړېدو خبرداری ورکوي، چې دا مهال په ولسي جرګه کې د ریاست پر سر جنجالونه دوام لري او تر اوسه وکیلان نهايي توافق ته نه دي رسیدلي.
د ولسي جرګې غړو په تازه اقدام کې یو شل کسیز پلاوی ټاکلی دی چې دغه ستونزه به حل کوي. ویل کېږي چې دواړو لورو لس لس کسان دغه پلاوي ته ور معرفي کړي دي، خو د تېرې ورځې غونډه یې بې پایلې وه.
وکیلان وايي، ټولو هوکړه کړې چې په ولسي جرګه کې اوسنۍ ستونزه باید حل شي او دغه پلاوی به خپلو غونډو ته ادامه ورکوي. په ولسي جرګه کې روان وضعیت په عامو افغانانو کې هم بد انځور پیدا کړی دی او ډېری خلک د ولسي جرګې پر اوسنیو کشمکشونو نیوکه کوي.
