د رایې وركوونكو د تقويتي نومليكنې بهير سبا پاى ته رسېږي

د هېواد په ۳۳ ولايتونو كې د راتلونكو ټاكنو لپاره د رايې وركوونكو د تقويتي نومليكنې بهير سبا پاى ته سېږي. د ټاكنو خپلواك كمېسيون وايي، د دغه بهير په لړ كې، چې د تېرې غبرګولي مياشتې په ۱۸مه نېټه پيل شوى، تر دا مهاله نېږدې ۲۰۰ زره كسانو خپل نومونه ثبت كړي دي. په پام كې وه، چې په غزني كې د رايې وركوونكو د عمومي نومليكنې بهير هم د غبرګولي مياشتې له ۱۸مې د چنګاښ تر اتمې نېټې دوام وكړي، خو ياد كمېسيون د يوې اونۍ لپاره وغځاوه. په غزني كې بيا تر دې دمه له ۴۰ زرو زياتو كسانو په راتلونكو ټاكنو كې د ګډون په هدف نومليكنه كړې ده. د ټاكنو خپلواك كمېسيون د معلوماتو له مخې، د هېواد په ۳۳ ولايتونو كې د رایې وركوونكو پر تقويتي او په غزني كې د هغوى پر عمومي نومليكنې ۲۳ ميليون ډالره لګښت راځي.