پاکستان کې د افغان کډوالو د اوسېدو موده وغځول شوه

دپاکستان حکومت په دغه هېواد کې د افغان کډوالو د اوسېدلو موده د یوه بل کال لپاره غځولې ده. په پاکستان کې د ملګرو ملتونو د کډوالو د عالي کمشنرۍ (یو این ایچ سی ار) لخوا په خپره شوې خبرپاڼه کې راغلي، چې د پاکستان د حکومت کابینې دغه موده د یوه بل کال لپاره غځولې ده. سرچینې زیاته کړې، چې په پاکستان کې ۱،۴ میلیون راجستر شوي افغان کډوال میشت دي او دوی کولی شي، په قانوني توګه دیوه بل کال لپاره هلته پاتې شي. په پاکستان کې د کډوالو عالي کمشنرۍ د پاکستان د دغه اقدام هرکلی او ستاینه یې کړې ده. د دې ادارې مشرې مینیکدیویلا ویلي، چې پاکستان له تېرو څو لسیزو د افغان کډوالو کوربه توب کوي او دوی به له پاکستان سره په دې برخه کې خپلو مرستو ته ادامه ورکوي.