د راتلونکو ټاکنو لپاره د تقویتي نوملیکنې موده پای ته رسېدلې، خو خلک له دغه پروسې شکایت لري. د ټولنیزو رسنیو کاروونکي او همدا راز نوماندانو ته نږدې کسان پر دغه پروسه نیوکه کوي او په خبره یې د ټاکنو کمېسیون دغه لړۍ محسوسه او ډېره اغېزمنه نه وه. د سیاسي چارو شنونکي او د ټاکنیزو ټیمونو غړي پر دې باور دي، چې د ټاکنو خپلواک کمېسیون د دغه مهمې پروسې په اړه اړین عامه پوهاوی نه دی ورکړی؛ نو خلک نه دي بریالي شوي چې د راتلونکو ټاکنو لپاره د نوملیکنې په برخه کې خپلې ستونزې حل کړي.
په تېره غبرګولې میاشت کې د ټاکنو خپلواک کمېسیون اعلان وکړ، چې د ولسمشریزو ټاکنو لپاره یې تقویتي نوملیکنه پيل کړې ده. کمیسیون وویل، دا لړۍ د هغو کسانو لپاره ده، چې نوی یې د اتلس کلنۍ عمر پوره کړی، په نوملیکنه کې یې ستونزې وې یا یې غوښتي چې د خپلې رایې اچونې مرکز بدل کړي. دغه بهیر په ۳۳ ولایتونو کې پيل شو، خو په غزني ولایت کې بیا عمومي نوملیکنه پیل شوې ده، چې یوه اونۍ نور به هم دوام کوي. په پاتې ۳۳ ولایتونو کې بیا د تقویتي نوملیکنې موده وړمه ورځ پای ته رسېدلې ده. د ټاکنو خپلواک کمېسیون د ټاکنو پر تقویتي نوملیکنه ۲۳ میلیونه ډالره لګولي دي.
بل پلو د ټولنیزو رسنیو کاروونکي او د ټاکنیزو ټیمونو غړي بیا وايي چې د ټاکنو خپلواک کمېسیون د دې مهمې پروسې په اړه اړین عامه پوهاوی او معلومات خلکو ته نه دي ورکړي. د ټولنیزو رسنیو کاروونکی او د سیاسي چارو شنونکی ثواب الدین مخکښ وایي، د ټاکنو لپاره تقویتي نوملیکنه دومره اغېزمنه نه ده. د نوموړي په خبره، د ټاکنو کمېسیون په دې اړه خلکو ته عامه پوهاوی نه دی ورکړی او د نوملیکنې وخت هم کم و. نوموړی وايي: ((د ولسمشریزو ټاکنو لپاره د نوملیکنې تقویتي پروسه هومره محسوسه نه ده، ډېر خلک ان نه پوهېږي چې څه شوي دي، څه وخت پیل شوي او څه وخت پای ته رسېدلي دي)).
تر دې وړاندې د حکومت اجرایه رییس هم پر دغه بهیر نیوکه کړې وه. هغه ویلي وو چې خلک د ټاکنو پلویان دي، باید وخت ورکړل شوی وی او په سمه توګه د نوملیکنې تقویتي پروسه مدیریت شوې وای. اجرایه رییس بیا په راتلونکو ټاکنو کې د شفافیت په اړه هم په ځلونو اندېښنه څرګنده کړې ده.
بلخوا د ټاکنو خپلواک کمېسیون بیا دغه پروسه له لاس ته راوړنو ډکه بولي. د ټاکنو خپلواک کمېسیون یو ویاند ذبیح الله سادات له مسیر ورځپاڼې سره په خبرو کې وویل، چې د نوملیکنې د تقویتي پروسې په اړه یې ډېر مخکې تبلیغات پيل کړي وو او په وینا یې دغه پروسه بریالۍ تېره شوې ده. د هغه په خبره، ۴۵۸ مرکزونه د تقویتي نوملیکنې لپاره مشخص شوي وو، چې له دې ډلې ۴۲۸ یې فعال وو. سادات وايي چې له غزني پرته په ۳۳ ولایتونو کې شاوخوا (۳۱۸۲۴۲) کسانو نوملیکنه کړې ده. د سادات په خبره، تر دریو زره ډېرو کسانو خپله نوملیکنه کې اصلاحات راوستي. همدا راز څه کم ۱۷ زرو کسانو بیا د خپلې رایې اچونې مرکز تغیر کړی دی.
ذبیح الله سادات د هغو څرګندونو په اړه چې ګواکې کمېسیون عامه پوهاوی نه دی ورکړی وایي، د ټاکنو کمېسیون مهالوېش ته ژمن دی، خو په مهالوېش کې د عامه پوهاوي لپاره تر ټاکل شوې مودې دوه ورځې وړاندې دوی عامه پوهاوی او اعلانات پیل کړي وو. د سادات په خبره، تر ۹۰۰ پورې د عامه پوهاوي لپاره ګومارل شوو مبلیغینو هم په دې پروسه کې برخه اخیستې ده.
خو له دې ټولو سره سره د راتلونکو ټاکنو په اړه نه یوازې نوماندان او عام خلک؛ بلکې څارونکي بنسټونه هم اندېښنې لري. پر ټاکنو ځینو څارونکو بنسټونو تېره ورځ هم رسنیو ته ویلي وو، چې د ټاکنیزو کمېسیونونو په چارو کې مداخله کېږي او دا هر څه به د راتلونکو ټاکنو شفافیت ته زیان ورسوي.
