روان کال نږدې زر افغان کډوال له اروپايي هېوادونو را ستانه شوي 

د کډوالو نړیواله اداره وایي، د روان ۲۰۱۹ کال له پیله تر دې دمه ۹۹۶ افغان پناه غوښتونکي له اروپايي هېوادونو خپل هېواد ته ستانه شوي دي. دغه ادارې ویلي، چې د یادو افغان پناه غوښتونکو له ډلې ۴۲۴ تنه په داوطلبانه او ۵۷۲ نور له دغه سازمان سره له همغږۍ پرته له اروپا ایستل شوي دي. د افغانستان د کډوالو او ستنېدونکو چارو وزارت د ویاند مرستیال بیا ویلي، چې د روان کال له پیل تر اوسه ۷۳۶ افغان پناه غوښتونکي له اروپايي هېوادونو ایستل شوي دي. د دغه وزارت د معلوماتو له مخې د روان میلادي کال له پیل څخه تر دامهاله ۲لکه او ۷۰زه افغان کډوال او پناه غوښتونکي له اروپا، ایران او پاکستان څخه افغانستان ته ستانه شوي دي.