بشري حقونو ته نه پاملرنه به د سولې هڅې ناکامې کړي

د افغانستان د بشري د حقونو کمیسیون وایي چې د جګړې د قربانیانو هیرول او دغې کشالې ته د حل لارې موندلو لپاره د یو میکانیزم نه جوړول به په افغانستان کې د سولې روانې هڅې ناکامې کړي. دغه کمیسیون د )ښځې، سوله او امنیت( تر عنوان لاندې یو راپور خپور کړی چې پکې په افغانستان کې د سولې د هلو ځلو د نه بریالي کېدو پړه په تېرو څوارلسو کلونو کې د بشري حقونو او انتقالي عدالت ته په نه پاملرنې اچولې ده. دغه راپور کې د افغانستان په ټولو ولایتونو کې تر ۵۰۰۰ ډېرو کسانو سره مرکې شوي دي چې پکې افغان حکومت او نړیوالې ټولنې باندې تاکید شوی چې د سولې هوکړه لیک ته د رسېدو لپاره بېړه وکړي. په دغه راپور کې راغلي دي، د بشري حقونو کمیسیون باور لري چې د سولې بهیر او هغې سره تړلې هوکړې باید د افغانستان د کشالې بېلابېلو برخو ته په کتلو وڅېړل شي او پکې بېړه وشي، هغه ځکه د دې امکان زیات دی چې د تېر په څېر د سولې په اړه هوکړې نه وروسته هم په دې هېواد کې جګړه او تاوتریخوالی دوام پیدا کړي. راپور زیاتوي، تر څو پورې چې د سولې خبرې اترې د عدالت په تامینولو او د ټولو وګړو د بشري حقونو په نظر کې ساتلو په اساس نه وي شوې او د جګړې د قربانیانو حقونو ته د درناوي په موخه لارې چارې نه وي لټول شوي، د سولې روان مذاکرات به کومه پایله ورنکړي.