خلیلزاد د خبرو بل پړاو ته د تیاري خبر ورکړی دی

زلمي خلیلزاد د افغان سولې په اړه د ځينې هېوادونو له استازو سره لیدلي دي. د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد ویلي چې په واشنګټن کې یې د افغان سولې لپاره د نورو کارونو تر څنګ هلته د ځینو هېوادونو له استازو سره لیدلي او د افغان سولې په اړه یې خبرې ورسره کړې دي. دده په وینا د جرمنې له مرستیالې سفیرې، د هند له سفیر او د ازبکستان د بهرنیو چارو له وزیر عزیز کاملوف سره یې کتلي دي. خلیلزاد زیاته کړې چې په دې لیدنو کې پر افغان سوله او په دې برخه کې پر لا ډېرو پرمختګونو خبرې شوې دي. خلیلزاد دا هم ویلي چې په نږدې راتلونکې کې به د خپلو هڅو بل پړاو پيل کړي او دی تمه لري چې لا ډېرې لاس ته راوړنې ولري.