د میدان وردګو ولسونه: حکومت مو د ترهګرو په نامه وژني او کورونه مو لوټوي

د میدان وردګو ولایت ولسونو نن په کابل کې د ولسي مرګ ژوبلې په غبرګون کې خبري ناسته کړې او د ګډو ځواکونو له لوري یې په دې ولایت کې د هوایي بریدونو او عملیاتو په لړ کې ملکیانو ته د اوښتې مرګ ژوبلې پر ضد اعتراض کړی دی. دوی له حکومته په بیلابیلو نومونو د ملکي وګړو د وژنې او د هغوی د کورونو د لوټلو د ژر تر ژره بندېدو غوښتنه کړې ده او دغه راز یې پر طالبانو غږ کړی دی چې جګړه له کلیو وباسي څو خلک په ارامه توګه خپل ژوند ته دوام ورکړي. دوی د یادې خبري ناستې په پای کې د یو پریکړه لیک په خپرولو سره ویلي، حکومت یې د چاپو او عملیاتو په بهانه کورونو ته ورځي، خلک وژني او له کورونه یې د سرو زرو په ګډون قیمتي وسایل لوټوي. دوی دغه راز د بشري حقونو پر نړیوالو بنسټونو غږ کړی دی چې د ملکي وګړو د مرګ ژوبلې مخنیوي په برخه کې دې د دوی غږ ته لبیک ووایي او نور دې نه پرېږدي چې دا ځورېدلی ملت د ترهګرۍ په نوم قرباني ورکړي.