ولسمشر غني: د سولې لپاره به بې سارې انعطاف وکړو خو شاتګ نه

ولسمشر غني وایي، سوله د دې ملت لومړنۍ او اساسي غوښتنه ده او د ملت په پیاوړو ارادو به بلاخره دا وطن د سولې کور جوړېږي. نوموړي چې نن یې په ارګ کې جوړې شوې غونډې ته خبرې کولې د افغانستان جمهوري نظام ساتنې ته په اشارې وویل، د سولې لپاره تر سر هم تېرېدای شي اما هغه څه چې د دې ملت په وینو تر لاسه شوي دي په هیڅ صورت ترې تېرېدونکی نه دی. هغه زیاته کړې، جمهوریت هغه څه دی چې افغانانو ورباندې قرباني ورکړې ده او دا هغه اصل دی چې د افغانستان نر او ښځې به یې په مېړانه دفاع ته راودانګي. هغه ویلي، د سولې لپاره به بې سارې نرمښت وښیي خو هغې دورې ته بېرته نه ستنېږي چې د خلکو حقوق پکې تر پښو لاندې شي. غني زیاته کړې، اوسمهال افغانان سولې او یووالي ته اړتیا لري ځکه نور نه غواړي دا ملت په اسیا کې د یو ماشوم یتیم په څېر ژوند وکړي او د هر چا لاس ته اړ پاتې شي.