په امریکا کې د پاکستان پخوانی سفیر وایي، طالبان هڅه کوي چې د امریکایانو له وتلو وروسته ځان په زور واک ته ورسوي. نوموړي په خپله تازه مرکه کې ویلي چې طالبان پر ټاکنو باور نه لري او ښایي د دې جوګه شي چې په افغانستان کې د پاکستاني استخباراتي ادارو فرمایشونه عملي کړي. حسین حقاني دا څرګندونې د افغانستان له یوه خصوصي ټلوېزیون سره په مرکه کې کړې دي.
حسین حقاني په امریکا کې د پاکستان سفیر و، خو کله چې پوه شو چې هېواد یې په سیمه کې په ورانکاره فعالیتونو لاس پورې کوي، نو د خپل هېواد له ځینو سیاستونو سره یې مخالفت پيل کړ او هماغه وو چې پاکستاني پوځ تر څارنې لاندې ونیو. هغه تر ډېره په افغانستان کې د پاکستان پر سیاستونو نیوکې کوي. تازه یې په یوه مرکه کې ویلي چې طالبان لا هم د پاکستان د استخباراتي ادارو تر ملاتړ لاندې دي او ښايي تر ډېره جګړو ته ادامه ورکړي.
حسین حقاني ویلي، طالبان پر ټاکنو باور نه لري او همدا چې امریکايي ځواکونه له افغانستانه د وتلو پرېکړه وکړي او دغه هېواد پرېږدي، نو دوی به د زور له لارې واک ته د رسېدو هڅه وکړي. حسین حقاني دا هم وايي چې په دې وخت کې به یې پاکستان ملاتړ وکړي او هڅه به وکړي چې په افغانستان کې د خپلو نیابتي کسانو پر مټ حکومت کنټرول کړي.
هغه له طالبانو سره د امریکا پر روانو خبرو هم نیوکه کړې او وایي چې طالبانو ته یو اړخیز امتیاز ورکوي. د ده په خبره، طالبان په رښتینې توګه سولې ته رسېدل نه غواړي، که یې غوښتی؛ نو اوربند به یې منلی و. نوموړی وايي: ((امریکا بندیان خوشې کړل، خبرې ورسره کوي، خو طالبانو تر اوسه څه کړي دي؟ جګړې یې شدیدې کړې دي. اوربند نه مني. دوی فکر کوي چې د جګړې له لارې بریالي کېږي. دوی لا هم د افغانستان حکومت په رسمیت نه پېژني. فکر کوم همدا چې امریکايي ځواکونه له افغانستانه ووځي، دوی به د زور له لارې واک ته د رسېدو هڅه وکړي)).
حسین حقاني په افغانستان کې د پاکستان پر سیاستونو هم نیوکه کړې ده. د نوموړي په خبره، که په افغانستان کې سوله وشي یا ونه شي، په دواړو حالتونو کې د پاکستان ګټې دي. هغه زیاته کړې چې که سوله راشي، جګړه ختمه شي او دلته د ثبات سبب شي، خو که سوله د جګړې د ختمولو سبب نه شي، نو پاکستان به دوه ګټې کړې وي. نوموړی وايي: ((که سوله وشي، خو جګړه ختمه نه شي، امریکایان له افغانستانه ووځي، د دوی له وتلو سره سم به طالبان واک ته د رسېدو کوښښ وکړي. پاکستان به دوه ګټې وکړي. یو دا چې د امریکا باور به خپل کړي چې په سوله کې یې همکاري وکړه او بل به په افغانستان کې د خپلو نیابتي جګړه کوونکو پر مټ حکومت کنټرول کړي او خپل ارمان ته به ورسېږي)).
دغه پخوانی پاکستانی ډيپلوماټ وایي، په افغانستان کې هغه مهال جګړه ختمېدلی شي چې د پاکستان د استخباراتي ادارو لاسوهنه بنده شي او دغه هېواد د طالبانو ملاتړ پرېږدي. هغه د افغانستان پر سیاسي څېرو هم دا نیوکه کوي چې ډېر کله په ځینو هېوادونو لکه، چین، روسیه، ایران او هند تکیه کوي. د ده په باور، دا مسایل هم هغه څه دي چې افغانستان ته ګټه نه شي رسولی.
حسین حقاني داسې مهال د افغان جګړې او سولې په اړه دغه څرګندونې کوي چې امریکا د سولې روان مذاکرات مثبت بولي او طالبان هم له دغو مذاکراتو راضي دي. افغان حکومت بیا په دې منځ کې اندېښنه لري او وایي، دوی له دې وېره لري چې ښايي د سولې دغه پروسه په افغانستان کې روانه جګړه ختمه نه کړي. دوی وایي، د داسې سولې ملاتړ کوي چې په افغانستان کې ددایمي ثبات او باعزته سولې سبب شي.
