ټرمپ له عمران خان سره خبرو کې: که لس ميليونه افغانان ووژنم په لس ورځو کې افغان جګړه ختموم

د امريکا متحده ايالاتو ولسمشر ډونالډ ټرمپ څو شيبې مخکې ،د پاکستان له لومړي وزير عمران خان سره په ګډ خبري کنفرانس کې وویل ،چې که چیرې زه وغواړم چي په افغانستان کي‌ جنګ ختم کړم، نو دا کار به فقط لس ورځې وخت وغواړي، مګر «زه باید لس میلونه افغانان ووژنم، ټرمپ وويل خو زه دا کار نه کوم.» هغه وویل دی نه غواړي چي افغانستان تباه او محوه کړي. ټرمپ د افغانستان د نه تباه کولو خبري څو ځله تکراري کړې.
ټرمپ دغه راز وویل موږ په افغانستان کې تر ټولو ستر بم واچوی، او موږ کولای شو چې همدا کار بیا بیا وکړو، خو موږ نه غواړو چې افغانستان پوپنا کړو.
ټرمپ وویل موږ نه غواړو چې د جهان پولیس واوسو. موږ په افغانستان کي ۱۹ کاله پاته شوي یو، نور بس دی. ټرمپ دغه راز وویل چي ډېر ژر به د افغانستان د سولې په اړه ښه خبرونه واورئ.
عمران خان وویل چي د افغانستان جنګ نظامي حل نه لري، او جمهورریس ټرمپ پر سمه لاره روان دی. عمران خان دغه راز د امریکايي اسیرانو د خلاصون وعده هم وکړه.
د ټرمپ له دغه څرګندونو څخه داسې ښکاريده چې خلیلزاد ته يې هدایت ورکړی دی چې د افغانستان لانجه سمدستي ختمه کړي. د ټرمپ په څرګندونو کې اطمینان پروت وو، او د قطر د خبرو په اړه زیات خوشبین ښکاريده.
د ټرمپ له اظهاراتو څخه داسي برېښېدله چي د عمران خان سره به خپل روابط لا ښه کړي،‌ او ښايي د پاکستان سره اقتصادي او نظامي مرستي له سره شروع کړي. ټرمپ وویل که چیري عمران خان پاکستان ته د تګ دعوت ورکړي، دی به پاکستان ته ولاړ شي، هغه وویل چي زیات پاکستاني ملګري لري.