مسلمیار: هیڅ ځواک نه شي کولی افغانستان له نقشې ورک کړي

د هېواد د مشرانو جرګې رییس فضل هادي مسلمیار د ټرمپ د هغو څرګندونو غبرګون کې چې ویلي یې دي، که وغواړي د افغانستان جګړه وګټي نو په یوه اوونۍ کې به د لس میلیونه انسانانو په وژلو سره دې جګړې ته د پای ټکی کېږدي، غبرګون ښودلی دی. هغه چې نن یې د یادې جرګې په غونډه کې خبرې کولې وویل، ټرمپ یو دروغجن انسان دی ځکه که یې غوښتلی افغانستان کې جګړه پای ته ورسوي نو په دې دومره موده کې به یې دا جګړه ختمه کړې وای. مسلمیار زیاته کړې، د ټرمپ څرګندونې نه یوازې افغانانو ته بلکې د ټولې نړۍ مسلمانانو ته سپکاوی دی. هغه د خپلو خبرو پر دوام ویلي، امریکا نه غواړي مسلمانان په اتفاق او اتحاد ژوند وکړي نو له همدې امله یې د افغانستان په ګډون په ټوله اسلامي نړۍ کې مسلمانان خپلو کې سره اچولي دي او دوی یې ننداره کوي. هغه زیاته کړې دا د ټرمپ شخصي نظر دی خو په نړۍ کې هیڅ داسې ځواک وجود نه لري چې د افغانستان په څېر امپراطورۍ ړنګوونکی هېواد د ځمکې له مخه محوه کړي.