زلمی خلیلزاد: د مذاکراتو لپاره د یوه موثر ټيم پر جوړولو کار روان دی

له طالبانو سره د مذاکراتو لپاره د یوه موثر ټیم پر جوړولو کار روان دی. د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد په تازه څرګندونو کې ویلي چې دی په کابل کې دی او د بین الافغاني خبرو د پيل لپاره د یوه موثر او پياوړي ټیم پر جوړولو کار روان دی. نوموړي په یوه ټوېټ کې له ولسمشر غني، اجرایه رییس او د بهرنیو چارو وزیر سره خپلې لیدنې ګټورې بللې دي. دده په وینا په دې لیدنو کې یې د سولې اړوند پر مهمو مسایلو خبرې کړې دي او هڅه روانه ده چې یو اغېزناک او ټول منلی افغان ټیم رامنځ ته شي. تر دې وړاندې هم زلمي خلیلزاد ویلي وو، چې افغان حکومت دې له طالبانو سره د خبرو لپاره یو ټول منلی، ملي، صادق او وطن ته ژمن ټیم جوړ کړي، خو افغان حکومت تر دې دمه دغه کار نه دی کړی.