ولسمشر غني: د ملکي وګړو په وژلو ترهګرو خپله دایمي دښمني ثابته کړه

ولسمشرۍ ماڼۍ په کابل ښار کې د نن ورځې پر له پسې بریدونه غندلي دي. د ارګ له مطبوعاتي دفتره په خپره شوې خبرپاڼه کې راغلي، د افغانستان دښمنانو د ملکي وګړو په وژلو سره ثابته کړه، چې دوی خپلې دښمنۍ ته ادامه ورکوي. ولسمشر غني ویلي ترهګرو په کابل کې په وحشتناکو بریدونو ثابته کړه، چې دوی هېڅ ډول اصولو او قوانینو ته درناوی نه لري. هغه برید غندلی او د پېښې ټپيانو ته یې د عاجلې شفا غوښتنه کړې ده. بل پلو د کانونو وزارت هم د یوې خبرپاڼې په خپرولو سره ویلي چې ددوی د ملکي مامورینو پر موټر ځانمرګی برید شوی او اته کسه پکې وژل شوي. دغه وزارت هم یاد برید غندلی دی. کورنیو چارو وزارت وایي چې سهار مهال د کابل ښار په شپاړسمه حوزه کې ځانمرګي بریدګر د کانونو وزارت پر موټر برید وکړ او د پېښې په سیمه کې وروسته دویمه چاودنه هم شوې ده. کابو یو ساعت وروسته د ۹مې امنیتي حوزې اړوند دسپيچري سیمه کې هم موټر بم برید شوی دی. کورنیو چارو وزارت وایي چې په درې واړو پېښو کې ۷ کسه وژل شوي ۲۱ نور ټپیان دي، خو د شمېرو د تغیر خبره یې هم کړې ده.