امریکا او بریتانیا: له افغان ځواکونو خپل ملاتړ ته دوام ورکوو

د امریکا او بریتانیا لوړپوړیو قومندانانو د افغان ځواکونو پر اوږدمهاله ملاتړ ټینګار کړی دی. له ارګه په خپره شوې خبرپاڼه کې راغلي چې ولسمشر غني نن مخکې له غرمې په ارګ کې د امریکا او بریتانیا د وسله والو ځواکونو له لویو قومندانانو جنرال جوزیف ډانفورډ او پاتریک کارټر سره لیدلي دي. د سرچینې په خبره په دې لیدنه کې دواړو لوریو له ترهګرۍ سره پر ګډه مبارزه ټینګار دی. په ورته وخت کې اجراییه رییس عبدالله عبدالله هم پرون له دې دوو لوړپوړیو قومندانانو سره لیدلي دي او د هېواد پر وروستیو امنیتي حالاتو یې ورسره خبرې اترې کړې دي. سرچینه کاږي چې ډانفورډ او پاټریک دواړو له افغان ځواکونو پر اوږدمهاله ملاتړ ټینګار کړی دی او زیاته کړې یې ده چې دواړه هېوادونه به ترهګرۍ ضد مبارزه کې له افغان ځواکونو سره اوږه په اوږه خپلې مبارزې ته دوام ورکړي.