المان یوه ډله افغان مهاجر اخراجوي

د کډوالو چارو وزارت وايي، چې راتلونکې اونۍ به له المان څخه نور افغان مهاجر اخراج شي. تر اوسه پورې له المان څخه ۶۰۰ رد شوي افغان مهاجرین افغانستان لېږدول شوي دي. د المان خبري اژانس د افغانستان د کډوالو چارو وزارت د يوه چارواکي له قوله ليکلي، چې د راتلونکې اوونۍ د چهارشنبې په ورځ به يوه بله ډله رد شوي افغان مهاجر کابل ته ولېږدول شي. تر اوسه دا معلومه نه ده چې څومره کسان به داځل افغانستان ته اخراج شي. د ۲۰۱۶م کال له ډسمبر مياشتې راهيسې په ۲۵ پروازونو کې ۶۰۰ نارينه افغان مهاجر له المان څخه افغانستان ته اخراج شوي دي. خو له المان څخه افغانستان ته د رد شوو افغان مهاجرو د اخراج موضوع جنجالي ده. د المان د ځينو ايالتونو چارواکي د رد شوو افغان مهاجرو پر اخراج باندې ټينگار کوي، خو ځينې سياستوال بيا وايي چې د افغانستان امنيتي وضعيت ته په کتو سره بايد مهاجر دغه هيواد ته اخراج نشي.