کورنیو چار وزارت؛ د ولسمشرۍ نوماندانو ته زرهي موټرونه ورکړي دي

کورنیو چارو وزارت وایي د ولسمشرۍ ټاکنو نوماندانو او د هغوی د مرستیالانو د امنیت لپاره یې هغوی ته نږدې پنځوس زرهي موټرونه ورکړي دي. د یاد وزارت ویاند نصرت رحیمي وایي، د دغو موټرو د وېش تر څنګ یې د هغوی د خوندیتابه لپاره کلک امنیتي تدابیر هم نیولي دي. ټاکل شوې سبا د ولسمشرۍ نوماندانو ټاکنیز کمپاینونه پیل شي، خو هغه څه چې د دې کارونو لپاره مهم دی هغه امنیت دی چې کورنیو چارو وزارت یې ډاډ ورکړی دی. رحیمي دغه راز ویلي، هر نوماند ته یو زرهي لنډکروزر او یو هایکلس ورکړي شوی دی او په خبره یې دا یې د مرستیالانو لپاره هم دي. هغه وویل، د دوی د امنیت لپاره یې دغه راز ۹۰۰ ساتونکي هم ګمارلي دي. خو یو شمېر نوماندانو د دې موټرو له اخیستلو ډډه کړې ده او لامل یې هم دا ښودلی چې د دې موټرو چلوونکي له امنیتي فلټره نه دي ایستل شوي.