د اداري اصلاحاتو کمیسیون:  ملکي مامورين د کوم نوماند په ګټه او زیان کمپاین نه شي کولی

د اداري اصلاحاتو او ملکي خدمتونو خپلواک کمېسیون له ټولو کارکوونکو غوښتنه کړې ده ،چې په شفاف ډول د ولسمشریزو ټاکنو د ترسره کولو په موخه، په رسمي ساعتونو او د دولتي امکاناتو په کارونې سره د نوماندانو په ګټه یا زیان کمپاین ونه کړي. د سرچینې په وینا، د یوه نوماند په ګټه په رای ورکوونکو باندې زور راوړل د دولتي امکاناتو او وسایلو کارول، د نوماندانو په ګټه یا زیان څرګندونې، د نوماندانو د کمزوري کولو او پیاوړي کولو په موخه د مقام کارول، په ټاکنیزو کمپاینونو کې ګډون او د ټاکنو نور اړوند فعالیتونه په رسمي ساعتونو کې د ټاکنیزو سیالیو پرمهال له منع شویو فعالیتونو څخه دي. سرچینه وایي، سرغړونکي له جدي قانوني چلند سره مخ کېږي او کېدای شي چې په عامه ادارو کې له دندې هم بې برخې شي.