زلمی خلیلزاد: له امریکا سره تر توافق وروسته بین الافغاني مذاکرات کېږي

د افغان سولې لپاره د امريکا استازى زلمى خليلزاد وايي د افغانانو خپلمنځۍ ناسته له طالبانو سره د امريکايي غاړې د تړون له بشپړېدو وروسته کېږي. زلمي خليلزاد په يوه ټويټري پيغام کې ويلي چې د افغانانو خبرې به د امريکايۍ غاړې او طالب استازو له خپلمنځيو هوکړو وروسته د طالبانو او يوې ټول شمولې ملي مرکچي ډلې ترمنځ وشي. هغه په خپل ټويټ کې ليکلي چې له طالبانو سره د دوى له تړون وروسته به د افغانانو دا خبرې د طالبانو او يو ټول شمولې، اغېزناکې او ملي مرکچي ډلې سره کېږي، چې په کې لوړ پوړي حکومتي چارواکي، د مهمو سياسي گوندونو استازي، مدني ټولنې او ښځي گډون ولري. د افغانانو وروستۍ خپلمنځۍ ناسته د روانې ميلادي مياشتې په لومړيو کې په دوحه کې جوړه شوه. که څه هم په ناسته کې د استازو گډون په انفرادي ډول و خو د افغان حکومت يو شمېر لوړ پوړو چارواکو په کې گډون درلود. ټاکل شوې چې راتلونکې بین الافغاني ناسته په یوه اروپايي هېواد کې ترسره شي.