حامد کرزی: راتلونکي بین الافغاني مذاکرات د دايمي سولې لپاره مهم ګام دی

له طالبانو سره مخامخ خبرې په افغانستان کې د دايمي ثبات لپاره تر ټولو مهم ګام دی. پخواني ولسمشر حامد کرزي ویلي دی د افغان حکومت او طالبانو ترمنځ د مخامخ خبرو پیلېدو ته هیله من دی او دا په افغانستان کې د دايمي سولې او ثبات د راتګ لپاره تر ټولو مهم ګام بولي. نوموړي پر افغان حکومت هم غږ کړی چې په دغه ملي پروسه کې ټول افغانان شریک کړي او په خبره یې داسې یو ټيم جوړ کړي چې د هر افغان استازیتوب وکړي او دغه ملي پروسه بریالۍ کړي. حامد کرزي د افغانستان له حکومت او خلکو هم غوښتنه کړې چې له یو بل سره دې همکاري وکړي او په دې توګه دې په افغانستان کې روانه خونړۍ او اوږده جګړه د تل لپاره پای ته ورسوي. هغه هیله څرګنده کړې چې افغان حکومت او طالبان وکړی شي په دې بین الافغاني مذاکراتو کې ښو پایلو ته سره ورسېږي او دلته پردۍ جګړه ختمه شي.