تېره ورځ په ټول هېواد کې په رسمي توګه د ولسمشریزو ټاکنو لپاره کمپاین پیل شو. نوماندان به نږدې دوه میاشتې په دې کمپاینونو کې د یو بل پر وړاندې سیالي کوي او خپلې برنامې به له ولس سره شریکوي. خو د کمپاین لومړۍ ورځ کمرنګه وه، یوازې ولسمشر غني او اجرایه رییس ډاکتر عبدالله عبدالله خپل کمپاین پرانیست او خپلو پلویانو ته یې ویناوې وکړې. نور نوماندان بیا وايي چې ټول دولتي امکانات د مشخصو نوماندانو لپاره کارول کېږي او د دوی اړتیاوو ته حکومت پاملرنه نه کوي.
پرون ولسمشر غني د لویې جرګې په خیمه کې خپلو پلویانو ته وینا وکړه، هغه تر ډېره تېرې ژمنې تکرار کړې او ولس ته یې وویل چې ده په خپله پنځه کله دوره کې هېواد او خلکو ته څه کړي دي. ډاکټر عبدالله عبدالله هم کمپاین پرانیست او په خپلو لومړنیو ویناوو کې یې پر ولسمشر غنی لفظي بریدونه وکړل او د هغه دوره یې فاسده، د فاسدو کسانو د ګومارلو او ناکاره کسانو د راوستو دوره وبلله.
بلخوا د ولسمشریزو ټاکنو هغه نوماندان چې ټاکنیز کمپاینونه یې نه دي پيل کړي وايي، ټول دولتي امکانات د یوه خاص ټیم په ګټه کارول کیږي او مخکې له مخکې ورته ټول دولتي امکانات برابر شوي دي. د ولسمشریزو ټاکنو نوماند فرامرز تمنا وايي: ((له تېرو دوو میاشتو راهیسې په کابل او ټولو لویو ښارونو کې لوحې او بېل بوردونه د ولسمشر غني د ټیم له لوري کرایه شوي دي. دوی د استقلال د جشن په پلمه ټول ځایونه نیولي دي او دوی نه شي کولی خپلې لوحې او انځورونه هلته نصب کړي. له دې ښکاري چې ولسمشر غني له خپل مقام ناوړه ګټه پورته کوي. هغه هر څه د ځان په ګټه څرخوي او ټول دولتي امکانات د ده په خدمت کې دي)).
ولسمشرۍ ټاکنو ته ولاړ ځینې نوماندان وايي، د کمپاینونو د کمرنګتیا یو لامل یې دوی ته د حکومت لخوا د امنیتي تدابیرو نه نیول دي. دوی وايي، د حکومت هغه ژمنې چې ټولو کاندیدانو ته به امنیتي امکانات ورکوي، نه دي پوره شوې. د ولسمشریزو ټاکنو نوماند ابراهیم الکوزی وايي: ((له نورو نوماندانو خبر نه یم، خو زما نه امنیت نیول شوی دی او نه امنیتي امکانات راته برابر شوي دي. ویاندویان دروغ وايي، ما پخپله هڅه کړې چې د کورنیو چارو له وزارت سره ستونزه حل کړم، خو ګټه یې نه ده کړې)).
په ورته وخت کې د ملي شورا غړي هم له ټاکنو مخکې سوله مهمه بولي او وايي، په افغانستان کې په ټاکنو د خلکو باور له منځه تللی دی. د ولسي جرګې غړی سید احمد سیلاب وایي: ((ټاکنو ته ولس اندېښنې لري. دا اوس هم چې ټاکنې کمرنګه دي، ولس فکر کوي چې ټاکنې نه کېږي. دوی فکر کوي چې سوله مهمه ده او ټاکنې ښايي د سولې لپاره وځنډول شي. رښتیاهم سوله مهمه وه، حکومت باید سوله تر ټاکنو مخکې کړې وای، ځکه سوله د شفافو او عادلانه ټاکنو سبب کېده)).
د انتخاباتي سیالۍ په لومړۍ ورځ ولسمشریزو ټاکنو ته د ولاړو کاندیدانو شکایتونه داسې مهال دي، چې د کابل ښار په واټونو کې د ولسمشر غني او اجرایه رییس عبدالله عبدالله په ګډون، محدود شمیر کاندیدانو خپل کمپایني عکسونه او بېنرونه لګولي او د نورو هغو نه تر سترګو کیږي.
