د يوه افغان سرتيري برید کې دوه امریکايي عسکر وژل شوي

په کابل کې د ناټو ځواکونو له لوري په خپره شوې خبرپاڼه کې ویل شوي، چې ددوی دوه عسکر نن د یوه ماموریت پر مهال وژل شوي دي. خبرپاڼې تر دې ډېر معلومات نه دي ورکړي. بل پلو راپورونه وایي چې دغه دوه عسکر په کندهار کې د ملي اردو په یوه نظامي اډه کې د یوه افغان سرتېري له لوري وژل شوي دي. په کندهار کې یوه لوړپوړي امنیتي چارواکي رسنیو ته ویلي، په دغه روزنیز مرکز کې افغان سرتېرو ته روزنه ورکول کېده، خو یوه افغان سرتېري پر امریکايي عسکرو ډزې کړې او دوه کسه یې وژلي دي. دده په وینا عسکر په ځوابي ډزو کې ټپي شوی او امریکايي عسکرو په ټپي حالت کې له ځان سره بېولی دی. بل پلو وسله وال طالبان وايي چې افغان عسکر پر امریکايي عسکرو ډزې کړې څلور کسه یې وژلي او دوه یې ټپیان کړي دي. طالبانو په ښکاره دا نه دي ویلي چې ددې برید تر شا ددوی لاس و کنه.