مایک پمپیو: ټرمپ له افغانستان د ځواکونو د ایستلو امر راته کړی دی

د امریکايي رسنیو د راپورونو له مخې د امریکا د بهرنیو چارو وزیر مایک پمپیو ویلي، دوی غواړي د ۲۰۲۰ز کال تر ټاکنو مخکې د خپلو ځواکونو ایستل پيل کړي. د پمپیو په خبره ټرمپ امر کړی چې له افغانستان د ځواکونو د وتلو لړۍ باید په امریکا کې تر ولسمشریزو ټاکنو مخکې پیل شي. نوموړي دغه راز ویلي، امریکا په افغانستان کې د جګړې پر سیاسي حل تمرکز کوي او هڅه کوي له سیاسي لارو افغان جګړه پای ته ورسوي. د پمپیو په وینا ټرمپ قوي اراده لري چې په افغانستان کې روانه بې پایه جګړه پای ته ورسوي. پومپیو په دې خبرو کې دا هم ویلي، نه یوازې له طالبانو سره د سولې او ځواکونو د وتلو خبرې شوې، بلکې د ولسمشر غني په ګډون له نورو افغانان سیاستوالو او مدني فعالانو سره په اړیکه کې دی او په وینا یې دې خبرو کې پرمختګ شوی او ډير هیله من دی.