یوناما: روان کال تر دې دمه تر ۳۰۰۰ ډېرو ملکیانو ته مرګ ژوبله اوشتې

يوناما وايي د روان میلادي کال په لومړيو شپږو مياشتو کې ۱۳۶۶ ملکيان وژل شوي او ۲۴۴۶ ملکيان ټپيان شوي دي. یوناما په خپل یوه راپور کې وایي، چې دا شمېره د تېر ۲۰۱۸ کال د ورته مودې په پرتله ۲۷ سلنه لږوالی ښيي. په ۲۰۱۸ کال د ملکي مرګ ژوبلې تر ټولو لوړه شمېره ثبت شوې وه. خو یوناما اندېښنه ښيي چې لا هم دا مرګ ژوبله د لوړېدو په حال کې ده، ځکه د ۲۰۱۹ د لومړيو درېو میاشتو پرتله په دویمه ربع کې ۲۷ سلنه لوړه شوې. یوناما له یوې خوا د جنورۍ له لومړۍ د جون تر وروستۍ نېټې پورې د ملکيانو په مرګ ژوبله کې د لږوالي هر کلی کړی خو ملکیانو ته د رسېدلي زیان شمېرې يې ټکان ورکوونکې او د نه منلو وړ بللې. د افغانستان لپاره د ملګرو ملتونو ځانګړي استازي تاداميچي یاماموتو ویلي، افغانانو ددوحې په خپلمنځي ناسته کې د ملکي وګړو د مرګ ژوبلې پر صفر کولو ټینګار کړی، نو ښکېلو لورو ته په کار ده، چې دا خبره عملي کړي. کابل، هلمند، فاریاب او غزني هغه ولایتونو دي چې په ترتیب سره تر ټولو لوړه ملکي مرګ‌‌ژوبله پکې ثبت شوې .