قریشي: افغانستان کې د سولې لپاره هرډول همکارۍ ته چمتو یو

د افغان سولې لپاره د امريکا خاص استازي زلمي خليلزاد د پاکستان له لومړي وزير عمران خان او د بهرنيو چارو له وزير شاه محمود قريشي سره، د افغان سولې په تړاو خبرې کړې دي. په دې لیدنه کې د پاکستان د بهرنیو چارو وزیر شاه محمود قریشي ویلي، چې په افغانستان کې د تلپاتې سولې لپاره بین الافغاني خبرې مهمې دي. د پاکستان د بهرنیو چارو وزارت په خپره کړې خبر پاڼه کې ویلي، چې خلیلزاد له قریشي سره په قطر کې د تېرې ناستې په اړه خبرې کړې دي. دواړ لورو ویلي، چې د افغان حکومت او طالبانو ترمنځ خپلمنځي خبرې د سولې لپاره ډيرې ګټورې دي. قریشي پر خپل ټویټر لیکلي، چې له خلیلزاد سره یې لیدنه ډیره ګټوره وه. نوموړي ویلي، چې پاکستان د افغان سولې په پروسه کې هرډول همکارۍ ته چمتو دی.