ټرمپ بیا هم ټینګار کړی چې ځواکونه یې له افغانستان وباسي

د امریکا ولسمشر ډونالډ ټرمپ په سپینه ماڼۍ کې په یوه خبري غونډه کې ویلي، ده یې په افغانستان کې د سرتېرو شمېر را کم کړی دی، خو هڅه کوي خپل ټول ځواکونه له دغه هېواد وباسي. د ټرمپ په خبره دی د افغانستان خلکو ته درناوی لري خو دوی ۱۹ کاله په افغانستان کې وو او اوس ددې وخت دی چې خپل کور ته ستانه شي. ټرمپ ډاډ ورکړی چې په نږدې ورځو کې به د سرتېرو د ایستلو پر سر توافق وشي. تېره ورځ ګڼو امریکايي رسنیو هم داسې راپورونه ورکړي وو، چې له طالبانو سره تر هوکړې وروسته به امریکا خپل ۶ زره سرتېري له افغانستان وباسي. دوی ویلي وو، چې ټرمپ تر ټاکنو مخکې د خپلو ځواکونو پر ایستلو ټینګار کوي او غواړي د افغان سولې هڅې یوې پایلې ته ورسېږي. بلخوا د امریکا د بهرنیو چارو وزیر مایک پمپیو بیا له ولسمشر غني سره په خبرو کې ویلي وو، چې خپل ځواکونه به مهالوېش او وضعیت ته په کتو وباسي او هېڅ وخت به اجازه ور نه کړل شي چې د امریکا د کلونو لاس ته راوړنې زیانمنې شي.