پر ټاکنو څارونکي بنسټونه: بې باوري ددې سبب شوې چې کمپاینونه ساړه شي

د ټاکنو څارونکي بنسټونه وایي چې د ټاکنو پر ترسره کېدو د نوماندانو بې باوري او پر پایلو یې بیا د خلکو بې باوري د دې لامل شوې، چې د ټاکنیزو کمپاینونو میدان ډیر سوړ وي. که څه هم ټاکنیز کمپاینونه نږدې یوه اوونۍ مخکې پیل شول، خو تر اوسه پورې د اتلسو نوماندانو له ډلې یوازې څلورو تنو یې کمپاینونه پيل کړي دي. د افغانستان د شفافو ټاکنو د بنسټ اجرايوي مشر نعیم ایوب زاده ویلي، که د ټاکنو فضا همداسې کمرنګه او سړه وي، نو د دې ګواښ شته چې ټاکنې دې هېڅ ترسره نه شي. نوموړی وايي، که په دې وضعیت ټاکنې هم وشي نو د کړکېچ رامنځته کېدو امکان په کې ډیر دی. دغه بنسټ په دې اړه په یوه راپور کې ویلي، چې د افغانستان په ۳۴ ولایتونو کې یې له ۵۰۰۰ کسانو سره مرکې کړې دي. په راپور کې پر نوماندانو د خلکو د بې باورۍ، پر ټاکنو باندې د نوماندانو بې باوري او د ټاکنو پر پایلو د خلکو او پخپله د کاندیدانو بې باوري په شان مسایل شامل دي. ایوب زاده ویلي، نړیواله ټولنه دې د ولسمشریزو ټاکنو په ترسره کولو کې خپلې ژمنې عملي کړي.