په قطر کې د طالبانو او زلمي خلیلزاد ترمنځ برخلیک ټاکونکي مذاکرات روان دي. د طالبانو د قطر دفتر مرستیال وایي، چې په دې پړاو مذاکراتو کې د طالبانو او امریکايي لوري ترمنځ د هوکړې د لاسلیک امکان دی او د توافق د لاسلیک کېدو په صورت کې به د ټولو خارجي ځواکونو د وتلو مهالوېش اعلانيږي او له هغه وروسته به بینالافغاني خبرې پيلېږي، چې حکومت به د یوه جهت په حیث پکې ګډون کوي.
طالبانو او امریکا اووه پړاوه مذاکرات تر سره کړل، تر دې چې دواړه لوري د یوه توافق پر لاسلیکولو سره سلا شوي او په دې اړه خبرې روانې دي. دوی د اتم ځل لپاره سره جرګه شوي دي او دواړه لوري د یوې هوکړې لاسلیکولو ته تیاری ښيي. د دې مذاکراتو تر پیل مخکې زلمی خلیلزاد په پاکستان کې و او هلته یې هم پر مهمو مواردو له پاکستاني چارواکو سره خبرې کړې دي.
بل پلو طالبان بیا د داسې یوه توافق د رامنځ کېدو خبره کوي، چې په هغه کې به د ټولو بهرنیو ځواکونو وتل شامل وي. په قطر کې د طالبانو د سیاسي دفتر مرستیال وايي، چې په دې پړاو مذاکراتو کې د یوه توافق احتمال موجود دی، داسې توافق چې له افغانستانه به د ټولو بهرنیو سرتیرو د وتلو بهیر پکې شامل وي.
مولوي عبدالسلام حنفي وایي، چې د نړیوالو څارونکو په حضور کې د دې توافق تر اعلان وروسته به خارجي ځواکونه په ټاکلي وخت له افغانستان څخه وځي او تر هغه وروسته به د مذاکراتو داخلي بُعد پیلیږي. نوموړی وايي: ((د توافق په صورت کې، د څارونکو په مخکې پر دې هوکړه کېږي چې ټول بهرني ځواکونه به له افغانستانه وځي. دا وتل به په هوکړه کې د جوړ شوي مهالوېش له مخې تر سره کېږي. تر دې وروسته د مذاکراتو داخلي اړخ پيلېږي. بیا به پر ټولو مواردو بحث کېږي. د اساسي قانون مسئله، د اسلامي نظام رامنځ ته کېدل، په امنیتي ادارو کې اصلاحات او دا ټول موارد د مذاکراتو داخلي بعد دی چې بحث به ورباندې وشي)).
سلام حنفي بیا دا هم وایي چې افغان حکومت به د یوه جهت په حیث په دې مذاکراتو کې برخه اخلي. دی وایي چې له امریکایانو سره تر هوکړې وروسته به بینالافغاني مذاکراتو ته داخل شي او افغان حکومت د یوه لوري په توګه په دې مذاکراتو کې برخه اخیستلی شي. نوموړی وايي: ((له امریکایانو سره تر هوکړې وروسته بینالافغاني مذاکرات پيلېږي. افغان حکومت د افغان او د یوه لوري په توګه په دې مذاکراتو کې برخه اخیستلی شي)).
حنفي لا هم ټینګار کړی چې افغان حکومت به د حکومت په توګه نه، بلکې د یوه افغان لوري په توګه په دې مذاکراتو کې برخه اخلي. دغه طالب چارواکی داسې مهال ورته څرګندونې کوي چې امریکا طالبان له افغان حکومت سره خبرو ته اړ بولي. خلیلزاد ویلي چې تر هوکړې وروسته به طالبان له افغان حکومت سره خبرو ته کېني.
په ورته مهال د افغان سولې لپاره د امریکا ځانګړی استازی زلمی خلیلزاد، چې په دوحه کې له طالبانو سره پر خبرو اترو بوخت دی، وايي، د طالبانو له لوري یې داسې نښې نښانې لیدلې چې دغه ډله غواړي د سولې نهايي توافق حاصل شي. خلیلزاد وايي: ((د طالبانو له لوري مې داسې زیګنالونه تر لاسه کړي، چې هغوی غواړي د سولې نهايي توافق وشي. موږ یوه ښه توافق ته چمتو یو، موږ د وتلو د توافق په لټه کې نه یو، بلکې سولې ته د رسېدو توافق په لټه کې یو، چې دا توافق کولی شي د ځواکونو وتلو ته لاره هواره کړي)).
په قطر کې د طالبانو او امریکايي پلاوي ترمنځ په دې پړاو مذاکراتو کې یوه توافق ته د رسېدو خبرې داسې مهال کیږي، چې ویل کیږي د طالبانو او امریکایي لوري ترمنځ تر هوکړې وروسته به د متحده ایالاتو او افغان حکومت ترمنځ هم یو توافق لاسلیک شي. ویل کېږي چې دغه پړاو مذاکرات به د افغان جګړې او سولې لپاره برخلیک ټاکونکي او مهم وي.
