نن هم په قطر کې د طالبانو او امریکا مذاکرات دوام لري

نن هم په قطر کې د طالبانو او امریکا ترمنځ خبرې روانې دي. د راپورونو له مخې د طالبانو او امریکا ترمنځ د اتم پړاو برخلیک ټاکونکې خبرې تېره ورځ لس بجې پيل شوې دي او نن به هم پر بېلو مسایلو بحث کېږي. د طالبانو د قطر دفتر ویاند سهیل شاهین ویلي، خبرې پيل شوې دي خو د ستونزو د حل او لا ډېر بحث لپاره به څو ورځې دوام کوي. ټاکل شوې چې په دې پړاو خبرو کې به د طالبانو او امریکا ترمنځ د افغان جګړې د پای ته رسولو هوکړه لاسلیک شي. د قطر دفتر مرستیال عبدالسلام حنفي بیا وایي، چې له امریکا سره تر توافق وروسته به له افغان لوري سره مذاکرات پيل شي. دده په وینا په توافق کې د ټولو بهرنیو ځواکونو وتل شامل دي او تر دې توافق وروسته د جګړې پر داخلي بعد خبرې کېږي. ټاکل شوې چې له طالبانو سره د امریکا تر هوکړې وروسته د بین الافغاني مذاکراتو بل پړاو پيل شي. د راپورونو له مخې دا ځل به خبرې په قطر کې نه بلکې په یوه اروپايي هېواد کې ترسره کېږي.