طالب پلاوی: پر اوربند او اصلاحاتو په بینالافغاني مذاکراتو کې خبرې کېږي

په قطر کې د طالبانو او امریکا ترمنځ خبرې لا هم روانې دي. تېرې دوې ورځې دواړو لورو اتم پړاو مذاکرات وکړل او مثبتو پایلو ته هیله من دي. طالب سرچینې وایي، دوی هیله لري چې دا ځل وکړی شي له امریکا سره نهايي توافق لاسلیک شي او د بهرنیو ځواکونو وتل پیل شي. په قطر کې د طالبانو د مذاکراتي ډلې غړي وایي، همدا چې له امریکا سره هوکړه لاسلیک شي، نو ورپسې جوخت بینالافغاني مذاکرات پيلېږي او په هغه کې پر ډېرو مواردو بحثونه شامل دي.
د طالبانو د قطر سیاسي دفتر وايي، له امریکا سره د سولې تر توافق وروسته به بهرني ځواکونه د مهالوېش له مخې په بشپړ ډول له افغانستانه وځي. د طالبانو د قطر دفتر د مرکچي پلاوي غړی مولوي شهاب الدین دلاور وایي، له امریکا سره تر هوکړې وروسته بینالافغاني مذاکرات پيلوي، چې له افغان حکومت سره به د یوه سیاسي جهت په توګه خبرې کېږي او اوربند هم د اجنډا یوه برخه ده. طالبان د امریکا له ټینګار سره سره لا هم وایي چې له افغان حکومت سره د یوه سیاسي جهت په توګه خبرې کوي، نه د حکومت په توګه.
بل پلو تر دې وړاندې د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد ویلي وو، چې اوربند له طالبانو سره د هوکړې برخه ده، خو اوس طالب پلاوی وایي چې پر اوربند به په بینالافغاني مذاکراتو کې خبرې کېږي.
د طالبانو د مرکچي پلاوي غړی مولوي شهاب الدین دلاور وايي، د سولې توافق به د نړیوالو شاهدانو په حضور کې اعلانېږي، چې تر هغې وروسته به له ټاکل شوي مهالوېش سره سم په بشپړ ډول بهرني ځواکونه له افغانستان څخه ووځي. نوموړی وايي: ((موږ تمه لرو چې د مذاکراتو دا مرحله بریالۍ شي. دا بریالۍ کېږي همدا چې توافق وشي، نو امریکایي عسکر او ټول ائتلافي ځواکونه او مشاورین به له افغانستانه وځي. دوی به مهالوېش ته په کتو له دې ځایه په بشپړه توګه وځي)).
د طالبانو د قطر دفتر وايي، له امریکا سره د سولې تر هوکړې وروسته، له افغان سیاسي جهتونو سره بینالافغاني مذاکرات پیلوي، چې افغان حکومت به هم د یو سیاسي جهت په توګه په دې خبرو کې ونډه اخلي. طالبان وايي، اوربند، د اسلامي نظام رامنځ ته کېدل او د اساسي قانون تعدیل د بینالافغاني مذاکراتو د اجنډا برخه ده. دلاور وايي: ((په بینالافغاني مذاکراتو کې به د اجنډا برخه اوربند هم وي. په اړینو اصلاحاتو او نورو مسایلو چې توافق وشي، بیا اوربند څه جګړه به هم د تل لپاره له هېواده ورکه شي)).
که له یوې خوا په قطر کې د طالبانو او امریکا خبرې د بریا په درشل کې دي، خو بلخوا دلته په کابل کې د بینالافغاني مذاکراتي ټیم پر سر اختلافات روان دي. ټاکل شوې وه چې افغان حکومت پنځلس کسیز ټیم له طالبانو سره د خبرو لپاره جوړ کړي، خو د سرچینو په خبره، په دې ټیم کې ۱۲ کسه د حکومت غړي او دری نور سیاسیون دي. پر همدې مسئله د سیاسیونو او افغان حکومت ترمنځ اختلافات دي او په دې ټیم کې د انډول ساتلو غوښتنه کوي.
د افغان سولې په تړاو له وروستيو پرمختګونو په داسې حال کې خبر ورکول کېږي، چې تازه د ناټو عمومي منشي هم ویلي چې له متحده ایالاتو سره به په ګډه په افغانستان کې د خپلو سرتېرو د برخلیک په اړه پرېکړه کوي.