ایران: په بېلو برخو کې له افغانستان سره اړیکې پراخوو

ایران وايي دوی په بېلو برخو کې له افغانستان سره د اړیکو پر پراختیا کار کوي. ګڼو ایراني چارواکو د افغانستان د مشرانو جرګې له مشر فضل الهادي مسلمیار سره د لیدنې پر مهال ویلي چې دوی په افغانستان کې د سولې له پروسې ملاتړ کوي او په بېلو برخو کې د اړیکو پراخولو او ښه کولو ته تیار دي. د ایران د قضايي برخې مشر له فضل الهادي مسلمیار سره د لیدنې پر مهال ویلي چې دوی په قضايي او حقوقي برخه کې هم له افغانستان سره همکارۍ ته تیار دي. ایراني چارواکو په افغانستان کې د روانو جګړو په اړه خواشیني څرګنده کړې خو وايي چې په دغه هېواد کې باید د نشه يي توکو د کښت په څېر د ترهګرۍ مالي سرچینې وچې شي. افغان لوري هم په دې لیدنه کې ویلي چې افغانان ایران خپل دویم کور بولي او زرګونه افغانان دمګړی په ایران کې کاروبار لري او هلته اوسېږي.