په قطر کې د افغان جګړې د پای ته رسولو لپاره هڅه روانه ده، خو ځینې سرچینې دا هم وايي چې هلته سر له اوسه د موقت حکومت د رامنځ ته کېدو په تړاو خبرې کېږي. ویل کېږي چې د امریکا او طالبانو تر توافق وروسته به د موقت حکومت پر جوړولو کار پیلېږي. ویل کېږي چې په ناروې یا جرمني کې به بینالافغاني ناسته تر سره کېږي او په دې ناسته کې به د افغانستان د راتلونکي حکومت او ټاکنو په اړه هم خبرې وشي.
له طالبانو سره د سولې د خبرو د پیل پر مهال دا ګنګوسې هم خپرې شوې، چې دغه ډله د ملي یووالي حکومت مخالفه ده او په هېڅ صورت ورسره مخامخ خبرې نه کوي. تر څنګ یې ویل کېدل چې موقت حکومت به رامنځ ته کېږي او دا حکومت به په هېواد کې ټاکنې تر سره کوي. د موقت حکومت د جوړېدو ګنګوسو د ولسمشرۍ نوماندان پر ټاکنو شکمن کړي او ډېرو نوماندانو خپل ټاکنیز کمپاین نه دي پیل کړي او د ځینو نورو کمپاین د پخوا په پرتله، سوړ او پیکه دی.
بلخوا طالبانو او د سولې مذاکراتو ته نږدې سرچینو کابل نیوز ته ویلي، د طالبانو او امریکايي پلاوي ترمنځ له اختر وړاندې د هوکړې د لاسلیکېدو احتمال دی. د یادو سرچینو په باور، د هوکړې تر لاسلیک وروسته په ناروې یا جرمني کې د بینالافغاني مذاکراتو ناسته کېږي او ښايي په دغه ناسته کې په افغانستان کې د قدرت د انتقال او نوي حکومت پر څرنګتیا بحث وشي. دغه سرچینې ویلي: ((د طالبانو او امریکايي پلاوي ترمنځ د سولې هوکړې تر لاسلیکېدو وروسته پر موقت حکومت کار پیلېږي. د موقت حکومت د مشرۍ لپاره د یو شمېر کسانو پر نومونو سر له اوسه غور روان دی)).
بلخوا د ملي یووالي حکومت له پيله د دغه طرحې او پلان مخالف دی. ولسمشر غني په ځلونو ویلي چې موقت حکومت د افغانانو په زیان دی او دی یې په پوره قوت مخالفت کوي.
بل پلو په کابل کې د طالبانو پخوانی چارواکی او د خلاصون لارې شورا مشر سید اکبر اغا بیا وایي چې د بنسټيزې او دایمي سولې لپاره ټاکنې باید وځنډول شي. د ده په خبره، پر ټاکنو ټینګار پخپله د جګړې اوږدول او د سولې د هڅو تخریبول دي. سید اکبر اغا وایي، تر هغه چې په افغانستان کې سوله نه وي راغلې، د شفافو ټاکنو تر سره کېدل ناممکن کار دی او حکومت ته پکار ده چې سولې ته تر ټاکنو لومړیتوب ورکړي.
د دې شورا نور غړي هم د سولې خبرو کې له پرمختګونو سره هممهاله تر انتخاباتو مخکې پر سولې ټینګار لري. دوی وايي، په افغانستان کې د سولې د ټینګښت لپاره په سیمه ییزه او نړیواله کچه هڅې روانې دي او دغه بهیر له پرمختګونو سره مخ دی، خو افغان حکومت بیا د انتخاباتو په تر سره کېدو ټینګار کوي. د دغې شورا غړي وايي چې سوله باید د انتخاباتو لپاره قرباني نه شي، ځکه د دوی په خبرّه، د ټاکنو په تر سره کېدو سره جګړه نه ختمېږي، بلکې مشکلات ډېرېږي.
د افغانستان د خلاصون شورا د بهرنیانو د وتلو ترڅنګ وايي، حکومت د ټاکنو په تړاو سلا مشورې پیل کړې دي، خو د سولې د ټینګښت لپاره له ولس سره مشورې نه کوي. دوی وايي، ولس د یوه مستحکم نظام غوښتونکی دی، څو وکولی شي په هېواد کې سوله تامین کړي. د خلاصون لارې شورا ټینګار کوي چې د افغانستان اوسني وضعیت ته په کتو، تر سولې هاخوا بل هېڅ ښه بدیل د ښې راتلونکې لپاره نشته.
د موقت حکومت او سولې لومړیتوب خبرې داسې مهال کېږي، چې حکومت هم د موقت حکومت مخالف دی او هم ټاکنې تر سولې مهمې بولي. دوی وایي چې پر خپل وخت ټاکنې کوي او له طالبانو سره د سولې مذاکرات هم پر مخ وړي.
