د پاکستان د مسلیم لیګ کوند غړي او ددغه هيواد د بهرنیو چارو مخکيني وزیر خواجه اصف د خپل هېواد پارلمان ته په خبرو کې ويلي، د دوی تګلاره دا وه څو د کشمیر او افغانستان مسئله سره ګډه او غوټه و ساتي او په دې چاره کې بریالي هم وو، خو عمران خان له امریکا سره په معامله کې د افغانستان او کشمېر مسئلې جلا کړې او د دوی د کلونو کلونو خوارۍ يې په اوبو لاهو کړې دي. نوموړي زياته کړې اوس به پاکستانیان په افغانستان کې د امریکا او هندوستان خدمت کوي، او کشمير نور د پاکستان له لاسه وتلی دی. هغه زیاته کړه، دا څنګه معامله ده؟ څنګه انصاف او څنګه فکر دی چې په افغانستان کې د سولې ټینګیدو لپاره دې خوشحالي وشي، او محفلونه دې جوړ شي، خو کشمیر کې دې وینې توی شي. ددغو څرګندونو غبرګون کې د پاکستان لومړي وزیر عمران خان ویلي چې ټرمپ سره یې د کشمیر په اړه ځانګړې خبرې نه دي کړې، یوازې په کشمیر کې یې د ستونزې د حل لپاره وړاندیز کړی چې اساسي هدف یې په سویلي اسیا کې اقتصادي وده او د کشمیرد ستونزې حل وو.
