څېړنې:  د بهرنیو چارو وزارت ګڼ شمېر ګومارنې غیر قانوني دي

په افغانستان کې د فساد پر وړاندې د مبارزې یوې خپلواکې ادارې ویلي، د بهرنیو چارو وزارت د ګومارنو په پروسه کې قانون نه دی مراعت شوی. د دې بنسټ په راپور کې راغلي، د بهرنیو چارو وزارت د ګومارنې سیستم ناسم دی او روڼوالی نه لري. خو د بهرنیو چارو وزارت ویاند صبغت الله احمدي بیا د اداري فسار پر وړاندې د څارنې او ارزونې ګډې خپلواکې کمېټې موندنې یو اړخیزه او سیاسي بللې دي. نوموړی دا راپور له نیمګړتیاو ډک بولي او ردوي يي. د اداري فسار پر وړاندې د څارنې او ارزونې ګډې خپلواکې کمېټې موندنې ښيي چې، د بهرنیو چارو وزارت تګلارې، طرحې او قوانین د لاسوهنو له امله ندي پلي شوي. د مالوماتو پر بنسټ، د ۲۰۱۱ زیږدېز کال څخه بیا تر ۲۰۱۷ کال پورې د بهرنیو چارو وزارت په ګومارنو کې له نږدې نیمايي کارکونکو د کانکور ازموینه نه ده اخیستې او کله بیا په ازموینو کې داسې کسان هم بریالي شوي چې په بهرنیو ژبو کې ناکام شوي وو. د دې کمېټې مالومات ښيي چې د بهرنیو چارو وزارت ۶۸ تنه کارکوونکي چې په ۲۰۱۴ او ۲۰۱۶ کالونو کې ګومارل شوي وو دندې يي سږ کال پیل کړې دي. دوی دغه راز وايي چې له سلو ډېر ډیپلوماټان چې بهر کې یې ماموریت پای ته رسېدلی و بېرته افغانستان ته نه دي راغلي.