امریکايي چارواکي: که د سولې هوکړه لاسلیک هم نشي امریکا خپل ځواکونه وباسي

یوشمېر امریکایي رسنیو د دې هیواد د چارواکو له قوله خبر ورکړی چې، که څه هم په قطر کې د امریکا او طالبانو ترمنځ روان مذاکرات بریالي دي، خو که د طالبانو او امریکا ترمنځ هوکړه لاسلیک هم نشي، امریکا له افغانستان څخه خپل ځواکونه وباسي. ټایمز مجلي لیکلي امریکا له افغانستان څخه د خپلو ځواکونو پر وتلو بېړه کوي او د امریکا ولسمشر ډونالډ ترمپ غواړي له ولسمشریزو ټاکنو وړاندې د افغان جګړې موضوع پای ته ورسوي. یاده رسنۍ وایي، امریکا او طالبان په افغانستان کې د امریکا د تر ټولو اوږدې جګړې د سوله ییز حل لپاره سره جرګه دي او یو شمير مهم پرمختګونه هم شوي دي. دا په داسې حال کې ده چې ویل کیږي د امریکا او طالبانو ترمنځ د لاسليک کېدونکي توافق متن نهایي شوی او له افغان حکومت سره هم شریک شوی دی، خو افغان حکومت تر دې دمه په دې اړه څه نه دي ویلي.