د ولسي جرګې غړي: د کانونو استخراج اوس د طالبانو ستره مالي سرچينه ده

د افغانستان د روڼتیا څار بنسټ وایي، چې افغان سوداګر او شرکتونه په قانوني توګه د افغانستان کانونو استخراج ته لیواله و خو ولسمشرۍ ماڼۍ د تدارکاتو کمېسیون نه په استفادې ډیر قراردادونه ځنډولي دي. په ورته مهال د ولسي جرګې یوشمېر غړي وايي، چې وسله وال طالبان دا مهال د افغانستان په ګڼو ولایتونو کې د کانونو په استخراج بوخت دي او له دې لار خپلې مالي اړتیاوې پوره کوي. د ولسي جرګې غړي پر حکومت نیوکه کوي چې د کانونو امنیت لپاره یې جدي ګام نه دی پورته کړی چې له امله یې وسله والې ډلې او ځايي زورواکي یاد کانونه په غیر قانوني توګه استخراجوي. د کانونو او پترولیم وزارت مني چې دا مهال د افغانستان ډیری کانونه د وسله والو ډلو او سیمییزو زورواکو له لورې کیندل کیږي خو په وینايي، چې امنیتي ادارو ډاډ ورکړی ،چې د وسله والو تر ولکې لاندې کانونه به ژر تر ژره یاد وزارت ته وسپاري.