ټرمپ: له طالبانو او افغان حکومت سره مو ګټورې خبرې لرلې دي

ټرمپ وايي له امریکایي چارواکو سره یې پر افغانستان خبرې ګټورې وې او ډېر ژر به د افغان سولې په اړه یوه مهمه هوکړه رامنځ ته شي. د امریکا ولسمشر په یوه خبري کنفرانس کې خبریالانو ته ویلي چې د خپلې کابینې له مهمو غړو سره یې د افغانستان د سولې په اړه خبرې کړې دي او ډېر ژر به په دغه هېواد کې د امریکايي ځواکونو حضور پای ته ورسېږي. ټرمپ ویلي دوی به یوه استخباراتي ډله په افغانستان کې پرېږدي او دغه ډله به هلته د ترهګرو ډلو مخنیوی کوي. ده د یوې پوښتنې په ځواب کې ویلي امریکا ځکه په افغانستان کې استخباراتي حضور غواړي، چې دغه هېواد د ترهګرو پر لابرتوار بدل نه شي. ټرمپ دغه راز ویلي چې له طالبانو او افغان حکومت سره یې هم خبرې ګټورې وې او په وینا یې په راتلونکو دوو اونیو کې به د یوې هوکړې د لاسلیک شاهدان وي. د امریکا ولسمشر یو ځل بیا ټینګار کړی چې خپل ځواکونه به له افغانستان وباسي خو د افغانستان او په سیمه کې د ترهګرۍ د څارلو لپاره به یې وړه او پیاوړې استخباراتي ډله فعالیت کوي.