ولسمشر غني د ټولو ترهګرو ډلو پر وړاندې پر مبارزې ټینګار وکړ

نوموړي چې نن یې په دارالامان ماڼۍ کې یوې غونډې ته خبرې کولې وویل، د هېواد دښمنان غواړي افغانستان د جګړې په ډګر بدل کړي او دلته د کلونو لاس ته راوړنې له منځه یوسي. ولسمشر غني یو ځل بیا ټینګار وکړ، چې وسله والو طالبانو د نورو ترهګرو ډلو د فعالیت لپاره زمینه برابره کړې ده او دغه ډله لا هم پر جګړه ټینګار کوي. ولسمشر غني بیا هم پر طالبانو غږ وکړ، چې خپل افغانیت دې ثابت کړي، له افغانانو سره دې مخامخ خبرې وکړي او د پردیو له منګولو دې ځان خلاص کړي. هغه ټینګار کړی چې هېواد په حساس وضعیت کې دی او د افغانانو یووالي ته اړتیا ده. ولسمشر پر ولس هم غږ وکړ چې له خپل حکومت سره همکاري وکړي. ولسمشر غني د سیمې او نړۍ پر هېوادونو هم غږ وکړ چې د ترهګرو ډلو پر پلانونو دې ځان خبر کړي او ددغه ډلو اصلي مرکزونه دې له منځه یوسي.