ولسمشر محمد اشرف غني د ناټو ځواکونو او په اروپا کې د امریکا د عمومي قوماندانۍ له قوماندان جنرال تود ولترز سره کتلي او د ترهګرۍ پر موجوده ګواښونو او مبارزې باندې یې خبرې کړې دي. په دې ناسته کې د ناټو ملکي استازي نیکولاس کې هم حضور درلود. ولترز وویل د ناټو سازمان له افغان ځواکونو سره خپل ملاتړ ته دوام ورکوي او په خبره یې ناټو او افغان ځواکونه د یوې موخې لپاره چې د ترهګرۍ له منځه وړل دي کار کوي. نوموړي وویل، دغه ځواکونه نه یوازې د افغانستان بلکې د سیمې او نړۍ د امنیت لپاره په ګډه مبارزه کوي. ولسمشر غني په خپلو خبرو کې له ناټو څخه د افغان ځواکونو د ملاتړ او روزنې له کبله مننه وکړه او وې ویل، په افغانستان کې د بهرنیو ځواکونو د شمېر زیاتېدل او کمېدل په امنیتي شرایطو پورې تړلې خبره ده. جنرال تود ولترز وویل ناټو به د یوه ستراتيژیک همکار په توګه د افغان ځواکونو تر څنګ ولاړه وي او خپلې کړې ژمنې به عملي کړي. دواړو لورو د افغان سولې پر روان بهیر هم خبرې کړې دي.
