ولسمشر غني: هم به سوله راځي هم به ټاکنې کېږي

ولسمشر غني یو ځل بیا ټینګار کړی، چې هم به سوله راځي او هم به ټاکنې پر خپل وخت ترسره کېږي. ولسمشر غني چې تېره شپه یې د دارالامان ماڼۍ پرانیستې په مراسمو کې خبرې کولې ویلي، اوس هغه وخت تېر شوی چې د افغانانو برخلیک به نورو ټاکلو. دده په خبره اوس خلک پوهېږي چې څه یې د هېواد په ګټه دي او څه یې په زیان. نوموړي دا هم وویل چې افغان حکومت د سولې د روانو خبرو له ټولو جزیاتو خبر دی، خو ځکه چوپ دی چې له طالبانو سره یې مخامخ خبرې نه دي پيل کړې. دده په وینا دوی به د سولې ټول جزیات له ملت سره شریکوي او هېڅ شی به له افغانانو پټ نه ساتل کېږي. نوموړي یو ځل بیا وویل، چې د افغانانو دښمنان، عام وګړي، مېرمنې، ماشومان او عامه تاسیسات په نښه کوي او افغان ځواکونه یې پر وړاندې هر ډول مبارزې ته تیار دي.