ضعیف: روسیه او پاکستان به د طالبانو لخوا د هوکړې تضمینوونکي وي

د طالبانو پر مهال پاکستان کې افغان سفیر عبدالسلام ضعیف وايي، چې د سولې هوکړه لیک به تر راتلونکو څو ورځو پور وروستی شي او د طالبانو په استازیتوب به ملا عبدالغني برادر دغه هوکړه لیک لاسلیک کړي. ضعیف ویلي، چې امریکايي استازي غواړي د هوکړې متن کې باید دا ولیکل شي، چې وسله وال طالبان به له ټولو ترهګرو ډلو سره خپلې اړیکې پرې کوي. نوموړی زیاتوي چې دواړه لوري د ۱۵ تر ۲۴ میاشتو کې د بهرنیو ځواکونو د بشپړ وتلو او همدا راز د ترهګریزو فعالیتونو د مخنیوي لپاره د تضمین په اړه بشپړې هوکړې ته رسېدلي دي. عبدالسلام ضعیف وايي روسیه او پاکستان به د طالبانو لخوا د هوکړې تضمینوونکي وي. دی وايي امریکا او طالب استازو ترمنځ له هوکړې یوه اونۍ وروسته به د افغانانو ترمنځ خبرې پیل شي. په همدې حال کې افغان حکومت وايي د افغانانو ترمنځ د خبرو لپاره یې د حکومت د مرکچي پلاوي نوملړ برابر کړی او د امریکا او طالبانو ترمنځ د هوکړې په تمه دی.