لیندسي ګراهام: امریکا دې خپل ملي امنیت طالبانو ته نه تسلیموي

امریکایي سناتور یو ځل بیا له افغانستان د امریکایي ځواکونو د وتلو په تړاو خبرداری ورکړی دی. مشهور امریکایي سناتور لینډسي ګراهام ویلي، که امریکا له افغانستان وځي نو دغه هېواد به یو ځل بیا د ترهګرو پر مرکز بدل شي. دده په وینا امریکا باید دې ته متوجه وي چې خپل ملي امنیت د طالبانو لاس ته سپاري او دغه ډله د القاعده او داعش پر وړاندې د جګړې جوګه نه ده. لیندسي ګراهام زیاته کړې چې د امریکایي ځواکونو تر وتلو وروسته به یادې ترهګرې ډلې په افغانستان کې خپل مرکزونه پراخ کړي او په دې سره به په امریکا کې یو ځل بیا د سپټمبر یوولسمه تکرار شي. نوموړي ټرمپ ته سپارښتنه کړې چې د امنیتي او استخباراتي ادارو معلوماتو ته کتنه وکړي او په دې سر خلاص کړي چې له افغانستان تر وتلو وروسته به امریکا ته کوم ګواښونه متوجه وي. تر دې وړاندې هم ګراهام له افغانستان د امریکايي ځواکونو د وتلو مخالفت کړی و. هغه اوس پر یوه طرحه کار کوي چې له مخې یې کانګرس باید ددې جوګه وي چې له افغانستان د امریکایي ځواکونو د وتلو مخنیوی وکړي.