په ننګرهار کې ترافیکي پېښې اوو کسانو ته مرګ ژوبله اړولې ده

په ننګرهار کې د یوې ترافیکې پېښې له امله څلور کسه وژل شوي دي. راپورونه وايي، چې نن شاوخوا لس نیمې بجې د ننګرهار ولایت په مهمند دره ولسوالۍ کې دوه مسافر وړونکي موټر سره ټکر شوي چې مرګ ژوبله یې اړولې ده. د معلوماتو له مخې په پېښه کې ۴ کسه وژل شوي او ۳ کسه نور ټپيان دي. په دې وروستیو کې د هېواد پر لویو لارو ترافیکي پېښو خلکو ته ګڼ مالي او ځاني تلفات اړولي دي. د ملي یووالي حکومت اجرایه رییس هم نن د وزیرانو شورا کې پر دې مسئله خبرې وکړې او له اړوندو ارګانونو یې وغوښتل چې پر لویو لارو د ترافیکي ستونزو د حل او خلکو د خوندیتوب لپاره اړین ګامونه اوچت کړي.